賑災

四川地震，我相信全球華人都為之動容，
話晒血濃於水嘛，
我完全理解同埋支持香港人救人心切有錢出錢o既善舉，
其實香港人做善事真係好鬼落力，
今次自己同胞有事，更加無托手踭，
但我真係好想講：
"夠啦."

每日出街，o係我屋企方圓四百米，
樂施會，民主黨，紅十字會，民建聯，婦女會，救世軍，東華三院，佛教聯會...
每個都叫你捐錢，
開著電視機，足足至少1/3時間講四川，
相信近來港人對四川地理常識有唔少增長，
捐款熱線水蛇春咁長，電話幾十個任君選擇...
打開報紙，全世界好似得一單新聞，每張相都幾乎差唔多，
"國殤"，"7.8"，"汶川縣" 佔據唔少版面篇幅

我重申 - 我覺得四川災民值得全人類支持；

但我強調 -
需要人支持o既絕非只有四川o既災民，
亦絕對唔係億億聲o既人民幣就可以令佢o地幸福

數據話我知，直至2008年5月17日為止，
四川地震死亡人數係28,881人，
但早一個星期發生o既緬甸風災有超過70,000人死亡，
究竟有幾多香港人知道呢單新聞?
報紙有幾多篇報導?
甚至連聯合國都呼籲各國去協助救援緬甸，有冇香港人聽到?
香港慈善團體政黨係咪近排太忙?

全球每三分鐘有一個人餓死，呢個新聞對香港人係咪太陌生?
非洲除o左可以淘金沙，參觀桌山好望角，睇獅子老虎大笨象，
或者世界盃落重飛買尼日利亞 / 塞奈加爾 / 喀麥隆波膽之外，
似乎無o野令人留戀...

同一個世界，同一個夢想喎...

錢，中國人大把，根本三五七十億係等閒事，
問題係善款最終係放o係邊個人口袋入面，
大家捐錢前，有冇諗過唔同慈善團體o既行政費用係點樣?
佢o地o既正常開支係幾多? 平日請幾多明星搞幾個function?
善款最終轉交o既係邊個機構? 國務院? 四川市政府?
有錢o既，朱門酒肉臭，
盲目捐錢而未能真正落到災民手中，倒不如用o黎助長香港經濟，
或者盲目賑災唯一建樹會係令酒肉臭味更濃，足以蓋過屍臭味，
粉飾我國幹部們o既繁榮盛世...

有時候，對災民適當o既尊重，由衷o既支持，
比起不斷塞錢佢o地洗，來得更理性，
否則只會成為煽情新聞下o既一部提款機